Bazi rinoona nezvekufambiswa kwesarudzo munyika reZimbabwe Electoral Commission (ZEC) rinoti chirongwa chekunyoresa kuvhota chiri kuenderera mberi kumahofisi aro ari kumative mana enyika.
ZEC yaive yakavhura chirongwa chechimbi chimbi chekunyoresa kuvhota icho chaidanwa nezita rekuti Mobile Biometric Voter Registration Blitz, apo yaifamba munzvimbo dzakasiyana siyana.
Chirongwa ichi chaifanira kupera musi wa21 Kurume, chikazowedzerwa mazuva kusvika musi wa26 nekuda kwzvimhingamupini zvaisangana neZEC pakunyoresa vanhu.
Asi kupera kwechirongwa ichi cheBlitz, hakureve kuti kunyoresa kuvhota kwavharwa munyika, sezvo vanhu vanogona kuenda kunonyoresa kumahofisi eZEC ari pedo navo.
Vachinyora pandemutande ravo reTwitter, veZEC vakati chirongwa chekunyoresa kuvhota zvakanangana nesarudzo dza2023, kuchiri kwakavhurwa, kusvika patarwa zuva resarudzo.
ZEC
‘’Bhuku rekunyoresa kuvhota rinovhara, mazuva maviri mushure mekunge mutungamiri wenyika adoma zuva resarudzo (Section 26A yeElectoral Act). Saka musaverengere, endai kumahofisi eZEC nhasi chaiye mononyoresa kuvhota,
‘’Tinokuzivisai kuti mahofisi ese eZEC kumaprovince. Nekumatunhu anoramba akavhurwa kuti munyorese kuvhota mazuve ese epakati pesvondo (Monday to Friday) kubva nguva dza 08:00 kusvika 17:00krs,’’ yakadaro ZEC.
Gurukuota rinoona nezvemitemo, nezvekufambiswa kwebasa reparemende vaZiyambi Ziyambi vakatura ivo pamazuva apera kuti sarudzo dzichaitwa pazuva riripakati pa26 Chikunguru na 26 Nyamavhuvhu 2023, sezvinorehwa bumbiro remutemo renyika.
Asi nyanzvi dzinoona nezvekuitwa kwesarudzo dzinoti kunyangwe hazvo mahofisi aya ariko uye achiita basa, mahofisi acho ari kure nekunogara veruzhinji, uye kuti vamwe vanotofanirwa kukwira mabhazi kuti vaendeko.
Vamwewo vechidiki vanonzi vari kutadza kunyoresa kuvhota nekuda kwenyaya yezvitupa izvo zvinonzi zviri kunetsa kuwana munyika.
Dzimwe nhengo dzeparamende dzakambosimudzawo nyaya iyi dzichiti veZEC vanofanira kutaurirana nevekuzvitupa kana vave kuda kuita zvirongwa zvekunyoresa vanhu kuvhota.
Vekuzvi vanoti ivo varikunetseka nezvekushandisa pakugadzira zvitupa, nekuti havana mari yekuAmerica inodiwa, kwavanotenga zvinhu zvacho.
Sarudzo dza2023 ndedzechiviri, kubva vaimbova mutungamiri wenyika mushakabvu Robert Mugabe vabviswa pachigaro, navaEmmerson Mnangagwa vachibatsirana nemauto.
Sarudzo idzi ndedzechiripizve vaimbovamutungamiri webato rinopikisa reMDC vaMorgan Tsvangirai vashaya.
Zvakare dzinouya paine kakutatsuriran kuti bato rinopikisa hombe munyika nderipi, pakati peMDC-T inotungamirirwa navaDouglas Mwonzora neCitizens Coalition for Change inotungamirirwa navaNelson Chamisa
 rinoti chirongwa chekunyoresa kuvhota chiri){kind=link}